UPPL announces Joyanta Basumatary as Kokrajhar candidate: শাসকীয় মিত্ৰজোঁটৰ অংশীদাৰ ইউ পি পি এলে লাভ কৰা একমাত্ৰ আসন কোকৰাঝাৰৰ বাবে দলটোৱে লোকসভা নিৰ্বাচনৰ প্ৰাৰ্থী ঘোষণা কৰিছে। কোকৰাঝাৰৰ ইউ পি পি এল বা শাসকীয় মিত্ৰজোঁটৰ প্ৰাৰ্থী হ’ব জয়ন্ত বসুমতাৰী।
বুধবাৰে সংবাদমেলযোগে দলটোৱে প্ৰাৰ্থীৰ নাম ঘোষণা কৰিছে। ইয়াৰ লগে লগে অসমৰ ১৪ খন আসনৰ বাবে শাসকীয় বিজেপি-অগপ-ইউ পি পি এল মিত্ৰজোঁটৰ প্ৰাৰ্থীৰ নাম ঘোষণা সম্পূৰ্ণ হৈছে।
ইউ পি পি এলৰ প্ৰাৰ্থী লাভ কৰা জয়ন্ত বসুমতাৰী বৰ্তমান দলটোৰ চিদলী সমষ্টিৰ বিধায়ক। সংসদীয় ৰাজনীতিত ভৰি দিয়াৰ পূৰ্বে তেওঁ নিখিল বড়ো ছাত্ৰ সন্থা (এবছু)ৰ উপ-সভাপতি হিচাপে কাৰ্যনিৰ্বাহ কৰিছিল।
আগন্তুক নিৰ্বাচনৰ বাবে বিজেপি-অগপ-ইউ পি পি এল মিত্ৰজোটৰ বিজেপিয়ে ১১ টা সমষ্টিত প্ৰতিদ্বন্দ্বিতা কৰাৰ কথা ঘোষণা কৰিছে আৰু ইতিমধ্যে প্ৰাৰ্থীৰ নাম প্ৰকাশ কৰিছে। ইয়াৰ বিপৰীতে অগপই বৰপেটা আৰু ধুবুৰী সমষ্টিত প্ৰতিদ্বন্দ্বিতা আগবঢ়াইছে।
কোকৰাঝাৰ সমষ্টিত ইউ পি পি এলৰ উপৰিও ইতিমধ্যে কংগ্ৰেছে প্ৰাৰ্থিত্ব আগবঢ়াইছে। সমষ্টিটোত কংগ্ৰেছে এইবাৰ গৰ্জন মুছাহাৰীক প্ৰক্ষেপ কৰিছে।
ইপিনে, সমষ্টিটোৰ বৰ্তমানৰ সাংসদ নৱ কুমাৰ শৰণীয়াই পুনৰ প্ৰতিদ্বন্দ্বিতা আগবঢ়োৱাটো নিশ্চিত হৈ আছে। বৰ্তমানলৈ নাম ঘোষণা কৰা নাই যদিও বি পি এফেও সমষ্টিটোত প্ৰাৰ্থিত্ব আগবঢ়াব।
