Dog biscuit row: কংগ্ৰেছ নেতা ৰাহুল গান্ধীৰ শেহতীয়া এটা ভিডিঅ’কলৈ এতিয়া ব্যাপক চৰ্চা আৰম্ভ হৈছে। এটা কুকুৰক বিস্কুট খুওৱা মুহূৰ্তৰ ভিডিঅ’টো সম্প্ৰতি ছ’চিয়েল মিডিয়াত ভাইৰেল হৈ পৰিছে। এই ভিডিঅ’ৰ সৈতে সাঙোৰ খাইছে অসমৰ মুখ্যমন্ত্ৰী ড০ হিমন্ত বিশ্ব শৰ্মাৰ নাম।
ভাৰত জোড়ো ন্যায় যাত্ৰাৰ মাজতে ৰাহুল গান্ধীয়ে এটা কুকুৰক বিস্কুট খুৱাবলৈ চেষ্টা কৰা দেখা গৈছে। পাছত বিস্কুটখন তেওঁ এজন সমৰ্থকলৈ আগবঢ়াই দিছে। এই ভিডিঅ’টোক লৈ একাংশ বিজেপি কৰ্মীয়ে ৰাহুল গান্ধীয়ে কুকুৰক দিয়া বিস্কুট কংগ্ৰেছ কৰ্মীক খাবলৈ দিয়ে বুলি প্ৰচাৰ চলোৱা দেখা গৈছে।
মুম্বাই বিজেপিৰ আই টি আৰু ছ’চিয়েল মিডিয়া চেলৰ সহ-আহ্বায়ক হিচাপে পৰিছয় উল্লেখ থকা পল্লৱী চি টি নামৰ এগৰাকী য়ুজাৰে ‘এক্স’ত ভিডিঅ’টো পোষ্ট কৰিছে। পোষ্টটোত তেওঁ লগতে লিখিছে, “ কিমান নিৰ্লজ্জ। প্ৰথমে ৰাহুল গান্ধীয়ে তেওঁৰ পোহনীয়া কুকুৰ পিডিৰ সৈতে হিমন্ত বিশ্ব শৰ্মাক একেখন প্লেটৰ পৰা বিস্কুট খাবলৈ দিছিল। তাৰ পিছত কংগ্ৰেছৰ সভাপতি খৰ্গেজীয়ে দলীয় কৰ্মীক কুকুৰৰ লগত তুলনা কৰে আৰু এতিয়া, শ্বেহজাদাই এটা কুকুৰে প্ৰত্যাখ্যান কৰা বিস্কুট এজন দলীয় কৰ্মীক দিয়ে। এইটোৱেই তেওঁলোকৰ দলৰ কৰ্মী, সমৰ্থক আৰু ভোটাৰৰ প্ৰতি সন্মান নেকি?”
How shameless
First, Rahul Gandhi made @himantabiswa ji eat biscuits 🍪 from same plate as his pet dog 🐕 Pidi
Then Congress President Khargeji compares party workers to dogs 🐕
& now, Shehzada gives a biscuit 🍪 rejected by a dog 🐕 to a party worker
This is the RESPECT… pic.twitter.com/hXZGwGa2Ks
— PallaviCT (@pallavict) February 5, 2024
ইয়াৰ পাছতেই মুখ্যমন্ত্ৰী হিমন্ত বিশ্ব শৰ্মাইও এই পোষ্টটো ৰিপোষ্ট কৰি লিখিছে, “পল্লৱ জী, কেৱল ৰাহুল গান্ধীয়েই নহয় গোটেই পৰিয়ালটোৱে মোক সেই বিস্কুটটো খাবলৈ দিব নোৱাৰিলে। মই এজন গৌৰৱান্বিত অসমীয়া আৰু ভাৰতীয় ৷ খাবলৈ অস্বীকাৰ কৰি কংগ্ৰেছ ত্যাগ কৰিলোঁ।”
উল্লেখযোগ্য যে, ড০ হিমন্ত বিশ্ব শৰ্মাই কংগ্ৰেছত থকা শেষৰ সময়খিনিত এবাৰ ৰাহুল গান্ধীক সাক্ষাত কৰিবলৈ যাওতে ঘটা এনে এক ঘটনাৰ কথা ড০ শৰ্মাই কেইবাবাৰো প্ৰকাশ কৰিছে। ৰাহুল গান্ধীৰ বাসগৃহত তেওঁক চাহ খাবলৈ দিয়া হৈছিল। চাহৰ লগত এখন প্লেটত বিস্কুট দিয়া হৈছিল। ৰাহুল গান্ধীয়ে সেই বিস্কুট হিমন্ত বিশ্ব শৰ্মাৰ লগতে একেখন প্লেটৰ পৰা পোহনীয়া কুকুৰটোকো খাবলৈ দিছিল।
হিমন্ত বিশ্ব শৰ্মাৰ সৈতে হোৱা এই ঘটনা পাছলৈ ৰাষ্ট্ৰীয় ৰাজনীতিত সকলোৰে জনাজাত হৈ পৰিছিল। এতিয়া এই ভিডিঅ’টোৰ জৰিয়তে অনুৰূপ ঘটনাৰ পুনৰাবৃত্তি হোৱা বুলি বিজেপি নেতা-কৰ্মীয়ে দাবী কৰিছে।
কিন্তু ভাৰত জোড়ো ন্যায় যাত্ৰাৰ মাজত ঘটা এই ঘটনাটো বিজেপি নেতা-কৰ্মীয়ে প্ৰচাৰ কৰা ধৰণে নহয় বুলি দাবী কৰিছে ৰাহুল গান্ধীয়ে। তেওঁ এখন সংবাদমেলত সাংবাদিকৰ প্ৰশ্নৰ উত্তৰত ইয়াৰ স্পষ্টীকৰণো দিছে।
ৰাহুল গান্ধীয়ে কৈছে, “এজন লোকে কুকুৰটো লৈ আহিছিল। মই কুকুৰটোক বিস্কুট খাবলৈ দিছিলো, কিন্তু সি ভয় কৰি আছিল। মই তেতিয়া বিস্কুটখন কুকুৰটোৰ মালিকক তাক খুৱাবলৈ দিছিলো। মালিকে দিয়া সি বিস্কুটখন খাইছিল। কথা ইমানেই, ইয়াত ইছ্যু কিহৰ।”
তেওঁ লগতে প্ৰশ্ন কৰে যে বিজেপিৰ লোকসকলৰ কুকুৰক লৈ ইমান অসুবিধা কিয়, কুকুৰে তেওঁলোকৰ কি ক্ষতি কৰিলে। তেওঁ লগতে কুকুৰটোৰ মালিক কোনো কংগ্ৰেছ কৰ্মী নাছিল বুলিও দাবী কৰে।
লগতে পঢ়ক: Anti-cheating bill in Assam: প্ৰশ্নকাকত ফাদিলত ১০ বছৰৰ জে’ল, নকল কৰিলেও খাব লাগিব জে’লৰ ভাত
