Assam Congress MP Abdul Khaleque withdraws resignation: টিকট বঞ্চিত হোৱাৰ ক্ষোভত কংগ্ৰেছৰ প্ৰাথমিক সদস্য পদ ত্যাগ কৰা সাংসদ আব্দুল খালেকে অৱশেষত সিদ্ধান্ত সলনি কৰিলে। কংগ্ৰেছ এৰি নোযোৱাৰ কথা দি পদত্যাগ পত্ৰ প্ৰত্যাহাৰ কৰিলে সাংসদ খালেকে।
বুধবাৰে নিখিল ভাৰত কংগ্ৰেছ কমিটীৰ সভাপতি মল্লিকাৰ্জুন খাৰ্গেলৈ পত্ৰ প্ৰেৰণ কৰি তেওঁ পদত্যাগ উঠাই লোৱা বুলি জানিবলৈ দিয়ে। ইয়াৰ পূৰ্বে তেওঁ নতুন দিল্লীত এ আই চি চিৰ সাধাৰণ সম্পাদক কে চি বেণুগোপাল আৰু ছোনীয়া গান্ধীক সাক্ষাত কৰে।
তেওঁ আজি দাখিল কৰা পত্ৰখনক এ আই চি চিৰ অসমৰ তত্বাৱধায়ক তথা অসম প্ৰদেশ কংগ্ৰেছ কমিটীৰ সভাপতিৰ বিৰুদ্ধে অসন্তুষ্ট হৈ দল ত্যাগ কৰাৰ কথা ঘোষণা কৰিছিল বুলি উল্লেখ কৰে।
তেওঁ লগতে কে চি বেণুগোপাল আৰু ছোনীয়া গান্ধীৰ সৈতে সুন্দৰ আলোচনা হোৱা বুলিও জানিবলৈ দিয়ে।
উল্লেখযোগ্য যে, দুবাৰৰ বিধায়ক তথা বৰ্তমানৰ বৰপেটা সমষ্টিৰ সাংসদ আব্দুল খালেক এইবাৰ লোকসভা নিৰ্বাচনৰ প্ৰাৰ্থিত্বৰ পৰা বঞ্চিত হৈছে। ইয়াৰ পাছতেই দলৰ নেতৃত্বৰ বিৰুদ্ধে ক্ষোভ উজাৰি তেওঁ পদত্যাগ পত্ৰ প্ৰেৰণ কৰিছিল।