AGP Announces Candidates for Barpeta and Dhubri: জল্পনা-কল্পনাৰ অন্ত পেলাই অৱশেষত শাসকীয় মিত্ৰজোঁটৰ আনটো দল অসম গণ পৰিষদে ২০২৪ ৰ লোকসভা নিৰ্বাচনৰ বাবে দলীয় প্ৰাৰ্থী ঘোষণা কৰিলে। বৰপেটা আৰু ধুবুৰী সমষ্টিৰ প্ৰাৰ্থীৰ নাম ঘোষণাৰ পাছতেই এতিয়ালৈ অসমত শাসকীয় মিত্ৰজোঁটৰ মুঠ ১৩ জন প্ৰাৰ্থীৰ নাম ঘোষণা হ’ল।
সোমবাৰে অসম গণ পৰিষদে প্ৰাৰ্থী তালিকা প্ৰকাশ কৰি বৰপেটা সমষ্টিত ফণীভূষণ চৌধুৰী আৰু ধুবুৰী সমষ্টিত জাভেদ ইছলামৰ নাম ঘোষণা কৰে।
অসম গণ পৰিষদৰ জন্মলগ্নৰে পৰা বঙাইগাঁও বিধান সভা সমষ্টিক প্ৰতিনিধিত্ব কৰি আহিছে বৰ্তমানৰ বিধায়ক ফণীভূষণ চৌধুৰীয়ে। ২০১৪ চনৰ লোকসভাৰ নিৰ্বাচনতো চৌধুৰীয়ে অসম গণ পৰিষদৰ প্ৰাৰ্থী হিচাপে বৰপেটা সমষ্টিটোৰ পৰা অৱতীৰ্ণ হৈছিল, কিন্তু এ আই য়ু ডি এফ প্ৰাৰ্থী চিৰাজুদ্দিন আজমলৰ বিৰুদ্ধে শোচনীয়ভাৱে পৰাজয় বৰণ কৰিছিল।
বিগত কেইবাদিনৰ পৰাই ফণীভূষণ চৌধুৰীক এইবাৰ বৰপেটা সমষ্টিৰ প্ৰাৰ্থী হিচাপে প্ৰক্ষেপ কৰাৰ কথা প্ৰকাশ পাইছিল। এই খবৰে তেওঁ প্ৰতিনিধিত্ব কৰি থকা বঙাইগাঁও সমষ্টিত ব্যাপক প্ৰতিক্ৰিয়াৰ সৃষ্টি কৰিছিল। বিশেষকৈ বঙাইগাঁও অগপৰ যথেষ্ঠসংখ্যক নেতা-কৰ্মীয়েই এই সিদ্ধান্তৰ বিৰোধিতা কৰি আছিল। কাৰণ তেওঁলোকৰ শংকা, ফণীভূষম চৌধুৰীয়ে সাংসদ হৈ দিল্লীলৈ গুচি গ’লে বঙাইগাঁৱত অগপৰ গুৰি ধৰোতা কোনো নোহোৱা হ’ব।
ৰাইজৰ এনে প্ৰতিক্ৰিয়াৰ মাজতেই চৌধুৰীয়েও লোকসভা নিৰ্বাচনত অৱতীৰ্ণ নোহোৱাৰ কথা ঘোষণা কৰিছিল। অৱশেষত সকলো মত-বিৰোধৰ অৱসান ঘটাই তেওঁকেই দলে প্ৰাৰ্থী হিচাপে প্ৰক্ষেপ কৰিলে।
ইপিনে, ধুবুৰী সমষ্টিত অগপই পুনৰবাৰ জাভেদ ইছলামক প্ৰক্ষেপ কৰিছে। ২০১৯ চনতো সমষ্টিটোত অগপই ইছলামক প্ৰাৰ্থীত্ব প্ৰদান কৰিছিল, কিন্তু এ আই য়ু ডি এফৰ মুৰব্বী বদৰুদ্দিন আজমলৰ বিপক্ষে তেওঁ পৰাজিত হৈছিল।
আগন্তুক নিৰ্বাচনৰ বাবে অসমৰ ১৪ টা লোকসভা সমষ্টিৰ ১১ টা বিজেপিয়ে প্ৰাৰ্থীত্ব প্ৰদান কৰাৰ বিপৰীতে এই দুটা সমষ্টি অগপক এৰি দিছিল। একেদৰে, কোকৰাঝাৰ সমষ্টিত আনটো মিত্ৰদল ইউ পি পি এলে প্ৰতিদ্বন্দ্বিতা আগবঢ়াব।
