Union Budget 2024 Highlights in Assamese: কেন্দ্ৰীয় বাজেট অধিৱেশনৰ আজি দ্বিতীয় দিনা দেশৰ বিত্ত মন্ত্ৰী নিৰ্মলা সীতাৰমণে আগন্তুক ২০২৪-২৫ বিত্তীয় বৰ্ষৰ বাবে অন্তৰ্ৱৰ্তীকালীন বাজেট দাখিল কৰে। বৰ্তমানৰ বিত্ত মন্ত্ৰী নিৰ্মলা সীতাৰমণৰ এয়া ষষ্ঠখন বাজেট আৰু প্ৰধানমন্ত্ৰী নৰেন্দ্ৰ মোডী নেতৃত্বাধীন চৰকাৰৰ দ্বিতীয়টো কাৰ্যকালৰ অন্তিমখন বাজেট।
যিহেতু লোকসভা নিৰ্বাচনৰ পূৰ্বে এইখন শেষৰখন বাজেট সেয়ে এইখন এখন অন্তৱৰ্তীকালীন বাজেট। লোকসভা নিৰ্বাচনৰ জৰিয়তে নতুন চৰকাৰ গঠন হোৱাৰ পাছত চলিত বৰ্ষৰ জুলাই মাহত সম্পূৰ্ণ বাজেট দাখিল কৰা হ’ব।
এই বাজেটত বিত্তীয় একত্ৰীকৰণ, আন্তঃগাঁথনি, কৃষি, সেউজ বিকাশ, আৰু ৰে’লৱেৰ ওপৰত গুৰুত্ব আৰোপ কৰা পৰিলক্ষিত হৈছে। কিন্তু কৰ হাৰত কোনো সালসলনি কৰা হোৱা নাই।
ইয়াত ২৫ বিত্তীয় বৰ্ষৰ বিত্তীয় ঘাটিৰ লক্ষ্য জিডিপিৰ ৫.১ শতাংশ নিৰ্ধাৰণ কৰা হৈছে। আনহাতে ২৪ বিত্তীয় বৰ্ষৰ লক্ষ্যও সংশোধন কৰি ৫.৮ শতাংশলৈ হ্ৰাস কৰা হৈছে। ইফালে ২৫ বিত্তীয় বৰ্ষৰ কেপেক্সৰ লক্ষ্য ১১.১ শতাংশ বৃদ্ধি কৰি ১১.১ লাখ কোটি টকা হয়।
আজি সদনত বাজেট ভাষণ প্ৰদান কৰি বিত্ত মন্ত্ৰী নিৰ্মলা সীতাৰমণে কয়, “বিগত ১০ বছৰত ভাৰতৰ অৰ্থনীতিত এক ইতিবাচক পৰিৱৰ্তন দেখা গৈছে। মানুহে আশাৰে ভৱিষ্যতৰ ফালে চাই আছে। ২০১৪ চনত দেশখনৰ সন্মুখত বৃহৎ প্ৰত্যাহ্বান আছিল। সবকা সাথ, সবকা বিকাশৰ লক্ষৰে নৰেন্দ্ৰ মোডী নেতৃত্বাধীন চৰকাৰে সেই প্ৰত্যাহ্বানসমূহ অতিক্ৰম কৰিলে।”
অহা ৫ বছৰ অভূতপূৰ্ব উন্নয়নৰ বছৰ হ’ব আৰু ২০৪৭ চনৰ ভিতৰত উন্নত দেশ হোৱাৰ লক্ষ্য বাস্তৱায়িত কৰা হ’ব বুলি সীতাৰমণে উল্লেখ কৰে। তেওঁ লগতে কয় যে ‘গণতন্ত্ৰ, জনগাঁথনি আৰু বৈচিত্ৰ্য’ৰ ত্ৰিতত্বই প্ৰতিজন ভাৰতীয়ৰ আকাংক্ষা পূৰণ কৰিব পাৰে’।
২০২৪ চনৰ বাজেটৰ মূল উল্লেখযোগ্য দিশসমূহ:
আয়কৰ
এই বাজেটত কৰ ব্যৱস্থাৰ কোনো পৰিৱৰ্তন দেখা নগ’ল। বিত্ত মন্ত্ৰীগৰাকীয়ে বাজেট ভাষণত কয় যে যোৱা ১০ বছৰত কৰ সংগ্ৰহ দুগুণতকৈও অধিক হৈছে। লগতে কয় যে এই বছৰ কৰ ৰিটাৰ্ণৰ গড় প্ৰক্ৰিয়াকৰণ সময় ১০ দিনলৈ হ্ৰাস কৰা হ’ব।
আন্তঃগাঁথনি উন্নয়ন
যোৱা ৪ বছৰত দেশত অৰ্থনৈতিক বিকাশ আৰু নিয়োগ সৃষ্টিৰ ক্ষেত্ৰত বৃহত মূলধনী ব্যয় হৈছে। অহা বিত্তীয় বছৰৰ বাবে এই ব্যয়ৰ পৰিমাণ ১১.১ শতাংশ বৃদ্ধি কৰি ১১.১১ লাখ কোটিলৈ বৃদ্ধি কৰা হৈছে বুলি বিত্ত মন্ত্ৰী নিৰ্মলা সীতাৰমণে ঘোষণা কৰে। এয়া হ’ব দেশৰ জিডিপিৰ ৩.৪ শতাংশ।
ৰেলৱে
বিত্ত মন্ত্ৰী সীতাৰমণে ঘোষণা কৰে যে যাত্ৰীসকলৰ সুৰক্ষা, সুবিধা, আৰু আৰাম বৃদ্ধিৰ বাবে ৪০ হাজাৰ সাধাৰণ ৰেল বগীক বন্দে ভাৰতলৈ ৰূপান্তৰিত কৰা হ’ব। মেট্ৰ’ ৰে’ল আৰু নমো ভাৰতকে ধৰি মূল ৰে’ল আন্তঃগাঁথনি প্ৰকল্পসমূহ অধিক চহৰলৈ সম্প্ৰসাৰণ কৰা হ’ব।
লগতে, বাজেটত তিনিটা বৃহত ৰেলৱে কৰিডৰৰ কথাও বিত্তমন্ত্ৰীয়ে ঘোষণা কৰে। সেইকেইটা ক্ৰমে- বন্দৰ সংযোগ কৰিডৰ, শক্তি, খনিজ, আৰু চিমেণ্ট কৰিডৰ আৰু উচ্চ যান-বাহনৰ কৰিডৰ।
মালবাহী কৰিডৰৰ সৈতে একেলগে এই তিনিটা অৰ্থনৈতিক কৰিডৰ কাৰ্যসূচীয়ে আমাৰ জিডিপি বৃদ্ধি ত্বৰান্বিত কৰিব আৰু লজিষ্টিক খৰচ হ্ৰাস কৰিব বুলি সীতাৰমণে কয়।
লাখপতি বাইদেউ আঁচনি
বিত্ত মন্ত্ৰীগৰাকীয়ে ঘোষণা কৰে যে দেশৰ ৯ কোটি মহিলাৰ সৈতে ৮৩ লাখ আত্মসহায়ক গোটে সৱলীকৰণ আৰু আত্মনিৰ্ভৰশীলতাৰে গ্ৰাম্য আৰ্থ-সামাজিক পৰিৱেশৰ ৰূপান্তৰ ঘটাইছে। তেওঁলোকৰ এই সফলতাই ইতিমধ্যে প্ৰায় এক কোটি মহিলাক ‘লাখপতি বাইদেউ’ হ’বলৈ সহায় কৰিছে। এই সফলতাত উৎসাহিত হৈ ‘লাখপতি বাইদেউ’ আঁচনিৰ লক্ষ্য ২ কোটিৰ পৰা ৩ কোটিলৈ বৃদ্ধি কৰাৰ সিদ্ধান্ত লোৱা হৈছে।
বিদ্যুৎ
বিত্ত মন্ত্ৰী সীতাৰমণে বাজেট ভাষণত ছাদৰ ওপৰৰ সৌৰশক্তিৰ জৰিয়তে প্ৰতিমাহে এক কোটি পৰিয়ালে ৩০০ ইউনিট পৰ্যন্ত বিনামূলীয়া বিদ্যুৎ লাভ কৰিবলৈ সক্ষম হৈছে বুলি উল্লেখ কৰে। এই আঁচনিখন অযোধ্যাত শ্ৰী ৰাম মন্দিৰৰ অভিষেকৰ ঐতিহাসিক দিনত প্ৰধানমন্ত্ৰীয়ে লোৱা সংকল্পৰ পিছতে লোৱা হৈছে বুলি তেওঁ জানিবলৈ দিয়ে। বিনামূলীয়াকৈ সৌৰ বিদ্যুৎ উত্পাদনৰ জৰিয়তে আৰু অতিৰিক্ত বিদ্যুত বিতৰণ কোম্পানীসমূহক বিক্ৰী কৰাৰ ফলত পৰিয়ালসমূহৰ বাবে বছৰি ১৫,০০০-১৮,০০০ টকা পৰ্যন্ত ৰাহি কৰাত সহায়ক হোৱাৰ লক্ষ্য নিৰ্ধাৰণ কৰা বুলি সীতাৰমনে কয়।
সেউজ শক্তি
এইবাৰৰ বাজেটত ২০৭০ চনৰ ভিতৰত ‘নেট জিৰ’’ৰ প্ৰতিশ্ৰুতি পূৰণৰ দিশত তলত দিয়া ব্যৱস্থাসমূহ ঘোষণা কৰা হৈছে।
(ক) এক গিগা-ৱাটৰ প্ৰাৰম্ভিক ক্ষমতাৰ বাবে সাগৰৰ পাৰৰ বায়ু শক্তিৰ সম্ভাৱনাক ব্যৱহাৰ কৰাৰ বাবে ভাইবিলিটি গেপ ফাণ্ডিঙৰ ব্যৱস্থা কৰা হ’ব।
(খ) ২০৩০ চনৰ ভিতৰত ১০০ মেট্ৰিক টন কয়লা গেছীকৰণ আৰু দ্ৰৱীকৰণ ক্ষমতা স্থাপন কৰা হ’ব। ইয়াৰ দ্বাৰা প্ৰাকৃতিক গেছ, মিথানল, আৰু এমোনিয়াৰ আমদানি হ্ৰাস কৰাতো সহায়ক হ’ব।
(গ) পৰিবহনৰ বাবে সংকুচিত প্ৰাকৃতিক গেছত আৰু ঘৰুৱা উদ্দেশ্যৰ বাবে পাইপ যুক্ত প্ৰাকৃতিক গেছ (পিএনজি)ত সংকুচিত বায়োগেছ (চিবিজি) পৰ্যায়ক্ৰমে বাধ্যতামূলক মিশ্ৰণ কৰাতো বাধ্যতামূলক কৰা হ’ব।
(ঘ) সংগ্ৰহত সহায় কৰিবলৈ বায়োমাছ সংগ্ৰহ যন্ত্ৰ ক্ৰয়ৰ বাবে বিত্তীয় সাহায্য প্ৰদান কৰা হ’ব।
বৈদ্যুতিক বাহন
চৰকাৰে উৎপাদন আৰু চাৰ্জিং আন্তঃগাঁথনিৰ ক্ষেত্ৰত সহায় আগবঢ়াই বৈদ্যুতিক বাহন ব্যৱহাৰ সম্প্ৰসাৰণ আৰু শক্তিশালী কৰিব বুলি বিত্তমন্ত্ৰীগৰাকীয়ে কয়। পেমেণ্ট সুৰক্ষা ব্যৱস্থাৰ জৰিয়তে ৰাজহুৱা পৰিবহণ নেটৱৰ্কৰ বাবে ই-বাছৰ অধিক ব্যৱহাৰৰ ক্ষেত্ৰত উৎসাহিত কৰা হ’ব বুলিও তেওঁ লগতে কয়।
পৰ্যটন
বাজেটত বিত্ত মন্ত্ৰীয়ে ঘোষণা কৰে যে ৰাজ্যসমূহক বিশ্বব্যাপী আইকনিক পৰ্যটন কেন্দ্ৰসমূহৰ ব্ৰেণ্ডিং আৰু বিপণনৰ ব্যাপক বিকাশ কৰিবলৈ উৎসাহিত কৰা হ’ব। সুবিধা আৰু সেৱাৰ মানদণ্ডৰ ওপৰত আধাৰিত এটা ৰেটিং প্ৰণালী স্থাপন কৰা হ’ব। এই উন্নয়নবোৰৰ বাবে বিত্তীয় যোগান ধৰাৰ বাবে ৰাজ্যসমূহক দীৰ্ঘম্যাদী সূত-মুক্ত ঋণ প্ৰদান কৰা হ’ব। লাক্ষাদ্বীপকে ধৰি বিভিন্ন দ্বীপসমূহত বন্দৰ সংযোগ, পৰ্যটন আন্তঃগাঁথনি আৰু সুবিধাৰ বাবে প্ৰকল্প হাতত লোৱা হ’ব। ই নিয়োগ সৃষ্টিত সহায় কৰিব বুলিও বিত্ত মন্ত্ৰী সীতাৰমণে কয়।
বিনিয়োগৰ প্ৰচাৰ কৰা
২০১৪-২৩ বৰ্ষত প্ৰত্যক্ষ বিদেশী বিনিয়োগ (এফডিআই)ৰ প্ৰবাহ আছিল ৫৯৬ বিলিয়ন ডলাৰ, যি এক সোণালী যুগ চিহ্নিত কৰে। সেয়া হৈছে ২০০৫-১৪ বৰ্ষৰ প্ৰবাহৰ দুগুণ। বিত্ত মন্ত্ৰী নিৰ্মলা সীতাৰমণে তেওঁৰ ভাষণত কয় যে ‘First Develop India’ ভাৱনাৰে নিৰন্তৰ বিদেশী বিনিয়োগক উৎসাহিত কৰাৰ বাবে, চৰকাৰে বিদেশী অংশীদাৰসকলৰ সৈতে দ্বিপাক্ষিক বিনিয়োগ চুক্তিৰ আলোচনা কৰি আছে।
প্ৰযুক্তি
নতুন যুগৰ প্ৰযুক্তি আৰু তথ্যই মানুহৰ জীৱন আৰু ব্যৱসায় সলনি কৰি আছে। ইয়াৰ উপৰিও নতুন অৰ্থনৈতিক সুযোগ সক্ষম কৰি তুলিছে আৰু ‘পিৰামিডৰ তলত’ থকাসকলকে ধৰি সকলোৰে বাবে সুলভ মূল্যত উচ্চমানৰ সেৱা প্ৰদানৰ সুবিধা প্ৰদান কৰিছে বুলি বাজেট ভাষণত বিত্ত মন্ত্ৰী সীতাৰমণে কয়।
তেওঁ লগতে পঞ্চাশ বছৰৰ সুতমুক্ত ঋণেৰে এক লাখ কোটি টকাৰ কৰ্পাছ স্থাপন কৰা হ’ব বুলি ঘোষণা কৰে। এই কৰ্পাছে দীঘলীয়া সময় আৰু কম বা শূন্য সুতৰ হাৰৰ সৈতে দীৰ্ঘম্যাদী বিত্তীয় সাহায্য বা পুনৰ বিত্তীয় সাহায্য প্ৰদান কৰিব। ইয়াৰ ফলত ব্যক্তিগত খণ্ডক গৱেষণা আৰু উদ্ভাৱন যথেষ্ট বৃদ্ধি কৰিবলৈ উৎসাহিত কৰিব।
তেওঁ কয়, “আমাৰ যুৱ শক্তি আৰু প্ৰযুক্তিবিদ্যাক একত্ৰিত কৰা কাৰ্যসূচী থাকিব লাগিব।”
প্ৰতিৰক্ষাৰ উদ্দেশ্যে deep-tech technology শক্তিশালী কৰা আৰু ‘আত্মনিৰ্ভৰ ভাৰত’ ত্বৰান্বিত কৰাৰ বাবে এক নতুন আঁচনি আৰম্ভ কৰা হ’ব, বিত্ত মন্ত্ৰীয়ে লগতে কয়।
আয়ুষ্মান ভাৰত
আয়ুষ্মান ভাৰতক সকলো অংগনবাড়ী আৰু আশা কৰ্মীলৈ সম্প্ৰসাৰিত কৰা হ’ব বুলি বিত্ত মন্ত্ৰী সীতাৰমণে ঘোষণা কৰে। লগতে কয় যে সকলো মাতৃ আৰু শিশু স্বাস্থ্যসেৱা আঁচনি এখন ব্যাপক আঁচনিৰ অধীনত অনা হ’ব।
প্ৰধানমন্ত্ৰী আৱাস যোজনা
ক’ভিডৰ বাবে প্ৰত্যাহ্বানৰ মাজতো প্ৰধানমন্ত্ৰী আৱাস যোজনা (গ্ৰামীণ) ৰূপায়ণ অব্যাহত থকাৰ লগতে কেন্দ্ৰই তিনি কোটি ঘৰৰ লক্ষ্যত উপনীত হোৱাৰ ওচৰ চাপিছে। পৰিয়ালৰ সংখ্যা বৃদ্ধিৰ ফলত উদ্ভৱ হোৱা প্ৰয়োজনীয়তা পূৰণৰ বাবে অহা পাঁচ বছৰত আৰু দুই কোটি ঘৰ লোৱা হ’ব বুলি সীতাৰমনে কয়।
এম এছ এম ই
এম এছ এম ইসমূহক বিশ্বব্যাপী প্ৰতিযোগিতাত অংশগ্ৰহণ কৰিবলৈ প্ৰশিক্ষণ প্ৰদান কৰা আৰু তেওঁলোকৰ বিকাশৰ সুবিধা প্ৰদান কৰাটো গুৰুত্বসহকাৰে লৈ ইয়াক নীতিগত অগ্ৰাধিকাৰ দিয়া হৈছে বুলি সীতাৰমণে উল্লেখ কৰে। বিনিয়োগৰ প্ৰয়োজনীয়তা পূৰণৰ বাবে চৰকাৰে বিত্তীয় খণ্ড প্ৰস্তুত কৰিব বুলিও তেওঁ প্ৰকাশ কৰে।
কৃষি আৰু খাদ্য প্ৰস্তুতকৰণ
বিত্ত মন্ত্ৰীয়ে ঘোষণা কৰে যে কৃষি খণ্ডত মূল্য সংযোজন আৰু কৃষকৰ আয় বৃদ্ধিৰ প্ৰচেষ্টা তীব্ৰতৰ কৰা হ’ব। প্ৰধানমন্ত্ৰী কিষাণ সম্পদা যোজনাই ৩৮ লাখ কৃষকক উপকৃত কৰাৰ লগতে ১০ লাখ কৰ্মসংস্থাপনৰ সৃষ্টি কৰিছে। প্ৰধানমন্ত্ৰী মাইক্ৰ’ ফুড প্ৰচেছিং এণ্টাৰপ্ৰাইজছ যোজনাই ২.৪ লাখ আত্ম সহায়ক গোট আৰু ৬০ হাজাৰ ব্যক্তিক ক্ৰেডিট লিংকেজৰ জৰিয়তে সহায় কৰিছে। আন আন আঁচনিসমূহে চপোৱাৰ পিছৰ লোকচান হ্ৰাস আৰু উৎপাদনশীলতা আৰু আয়ৰ উন্নতিৰ বাবে কৰা প্ৰচেষ্টাসমূহৰ পৰিপূৰক হিচাপে কাম কৰিছে।
খণ্ডটোৰ দ্ৰুত বিকাশ নিশ্চিত কৰিবলৈ চৰকাৰে একত্ৰীকৰণ, আধুনিক সংৰক্ষণ, দক্ষ যোগান শৃংখল, প্ৰাথমিক আৰু মাধ্যমিক প্ৰক্ৰিয়াকৰণ, আৰু বিপণন আৰু ব্ৰেণ্ডিংকে ধৰি চপোৱাৰ পিছৰ কাৰ্য্যকলাপত ব্যক্তিগত আৰু ৰাজহুৱা বিনিয়োগক অধিক প্ৰসাৰিত কৰিব বুলিও তেওঁ লগতে কয়।
বিত্তীয় ঘাটি আৰু অন্যান্য
- ২৫ বিত্তীয় বৰ্ষৰ বিত্তীয় ঘাটিৰ লক্ষ্য জিডিপিৰ ৫.১ শতাংশ।
- ২৪ বিত্তীয় বৰ্ষৰ বিত্তীয় ঘাটিৰ লক্ষ্য পূৰ্বৰ ৫.৯ শতাংশৰ তুলনাত জিডিপিৰ ৫.৮ শতাংশলৈ হ্ৰাস কৰা হৈছে।
- ডিছেম্বৰলৈকে বিত্তীয় বৰ্ষ ২৪ৰ প্ৰথম ৯ মাহৰ বাবে বিত্তীয় ঘাটি ৯.৮২ লাখ কোটি টকা বা বাৰ্ষিক অনুমানৰ ৫৫ শতাংশ।
- বিত্তীয় বৰ্ষ ২৫ চনৰ মূলধনী ব্যয় ১১.১ লাখ কোটি টকা নিৰ্ধাৰণ কৰা হৈছে, যিটো ১১.১ শতাংশ বৃদ্ধি।
- বিত্তীয় বৰ্ষ ২৫ৰ মুঠ ব্যয় ৩০.৮০ লাখ কোটি হোৱাৰ আশা কৰা হৈছে।
- বিত্তীয় বৰ্ষ ২৪ৰ বাবে মুঠ ব্যয়ৰ সংশোধিত অনুমান হৈছে ৪৪.৯০ লাখ কোটি টকা।
